Urime Vaxhid Sejdiu! Kështu mbillet dashuria për gjuhën tonë të ëmbël, për Flamurin tonë kuq e zi, për Nënën e gjithë shqiptarëve, Shqipërinë tonë, për kulturën dhe historinë e popullit shqiptar. Kjo quhet atdhedashuri. Kjo quhet shqiptari. Shembullin e Vaxhiut dhe kolegëve të tij duhet ndjekur mërgimtarët dhe shqiptarët tanë të shpërndarë edhe në vendet tjera (sidomos në Turqi e Greqi), deri në Australi. Dashuria për gjuhën, kulturën, Flamurin dhe Atdheun tonë të përbashkët – Shqipërinë, duhet të mbillet e përhapet edhe nga shkolla shqipe në Shqipërinë andej e këndej Drinit, nga mësuesit, nga klerikët e feve tona dhe nga gjithë shoqëria shqiptare… Ju priftë e mbara në këtë mision kombëtar, qytetërues e fisnik! (Xh. Gjini)
Mirë se vini në Shkollën Shqipe në Zvicër!
Nxënës të dashur, ato duart e juaja, të bukura që për mrekulli e bëjnë shqiponjën, nuk do të kenë kuptim të mjaftueshëm pa njohjen e gjuhës shqipe.
Prandaj, Viti i Ri shkollor 2021/22 në “Shkollën Shqipe në Zvicër” me padurim po e pret fillimin e tij. Nxënësit në shumicën e kantoneve në Zvicër fillojnë me mësim këtë javë. Bashkë me ta edhe nxënësit e shkollës shqipe të kantonit të St. Gallen-it, Arga-ut, Thurga-ut, Bern-ës, Valis-it, Urit, Grabünden-it, Apenzell-it, Solothurn-it, Basel-it, Cyrih-ut …, fillojnë me mësimin në gjuhën amtare. Jemi të bindur se ditët në atdhe kanë kaluar shumë shpejt sa që shumica prej jush, bëjnë të njëjtën pyetje, të cilën shpesh ne të rriturit ia parashtrojmë vetes : “A thua a ishim në vendlindje?”.
Por, megjithatë jemi të bindur se tani keni më shumë forcë se në Qershorin që e lamë pas. Bankat shkollore po ju presin dhe mësueset e mësuesit i kanë bërë të gjitha përgatitjet, që ju ta ndjeni veten si në vendlindje.
Mirë se vini!
Edhe sivjet ju presin shkronjat e shqipes, mësimet në lëmin e letërsisë, historisë, gjeografisë dhe kulturës shqiptare. Sa shumë keni për të mësuar sepse gjuha shqipe krahasohet me valët e detit. Ashtu si valët e detit që nuk përfundojnë edhe mësimet në gjuhën shqipe nuk përfundojnë kurrë. Prandaj, ju të gjithë duhet të përgatiteni që të “notoni” sa më mirë në valët e saj, sepse nuk ka më keq se kur një fëmijë nuk e njeh gjuhën e nënës – gjuhën amtare. Ju e ndjeni fare mire nganjëherë kur ju mungojnë fjalët dhe se si mundoheni të gjeni rrugëdalje me ndonjë fjalë tjetër për ta treguar kuptimin e mendimit. Por, për të gjitha ka zgjidhje. Prindërit e juaj e kanë për obligim që t`iu sjellin në orët e gjuhës shqipe, kurse ne bashkë me ju të “notojmë” gjatë tërë vitit në dallgët e gjuhës shqipe, dallgë të cilat padyshim se do t`iu pëlqejnë shumë. Në qershor mbyllën mësimet 51 pika shkollore me 805 nxënës, sivjet shpresojmë që ky numër të dyfishohet, jo vetëm sa i përket shkollave kur organizohen orët mësimore, por edhe numrit të nxënësve. Sivjet “Shkolla Shqipe në Zvicër” përfshinë mbarën shtetin helvetik – Zvicrën dhe në të gjitha kantonet organizohen orët mësimore në gjuhën shqipe.
Dhe fare në fund ju përkujtojmë edhe pse ua kemi thënë vazhdimisht se gjuha e nënës është themel i identitetit kombëtar, ajo mbron flamurin, identitetin, atdheun. Nuk mjafton të thuash jam shqiptar nëse nuk e di edhe gjuhën shqipe.
Ato, duart e juaja, të bukura që për mrekulli e bëjnë shqiponjën, nuk do të kenë kuptim të mjaftueshëm pa njohjen e gjuhës shqipe.
Mirë se vini!
add a comment
