TIRANË, 2 korrik/ATSH/ U hap sot për qarkullim rruga më e re në Shqipëri, Kardhiq-Delvinë dhe tuneli i Skërficës, duke shënuar realizimin e një prej rrugëve më strategjike për zhvillimin e turizmit në bregdetin e Jugut, e cila shkurton me 45 minuta udhëtimin drejt Sarandës, duke rritur sigurinë rrugore, si dhe duke ofruar një tjetër spektakël të natyrës shqiptare.
Vepra e shumëpritur prej banorëve të zonës dhe jo vetëm, si dhe e premtuar për dekada me radhë, është e hapur, për të lehtësuar ndjeshëm komunikimin e automjeteve, sidomos tashmë që sezoni veror, ka shtuar dukshëm fluksin e tyre.
Përfundimi i rrugës së re Kardhiq – Delvinë, me gjatësi 33 kilometra, u shndërrua sot në një festë të vërtetë për banorët nga të dy anët e rrugës, ku u zhvilluan një sërë aktivitetesh promovuese, siç ishin panairet me produkte kulinarie të zonave përreth, Festivali i Riteve, ekspozita me foto nga vendet më të bukura turistike, etj.
Kryeministri Rama e nisi vizitën në rrugën e re, nga portali i tunelit, në krahun e Gjirokastrës, së bashku me ministren e Infrastrukturës dhe Energjisë Belinda Balluku dhe ministren e Turizmit dhe Mjedisit Mirela Kumbaro, e më pas përshkoi tunelin për të dalë në zonën e Delvinës.
Tuneli, i cili u realizua 2 muaj përpara afatit të parashikuar në kontratë, kalon në qafën e Skërficës, dhe ndodhet ndërmjet lotit 4 dhe lotit 6 të rrugës Kardhiq-Delvinë. Ky është segmenti me kushtet më të vështira si nga ana ndërtimore, dhe nga kushtet gjeologjike, duke pasur parasysh terrenin ku kalon.
“Sot dorëzojmë tunelin e Skërficës. Është loti i shtatë i Kardhiq – Delvinë, një vepër e nisur në 2008 me tre lote të mbetura rruguëve të cilat u përfunduan në 2018, 10 vite pas. Më pas në 2018 kemi nisur lotet e tjera, 4, 5 dhe 6 që i dorëzuam në 2021 dhe loti që tani po kalojmë që është tuneli i Skërficës, është loti i shtatë. 1.3 kilometra tunel dhe me dy portalet hyrëse, 1.3 të tjera, pra 2.6 kilometra në total. E kemi nisur në gusht të 2020 për ta përfunduar në gusht të 2022 dhe siç premtuam ditën e hapjes e kemi përfunduar 2 muaj më parë për të qenë i gatshëm për sezonin e këtij viti. Rëndësinë e këtij aksi e kemi thënë shpesh herë. Është një nga pjesët më të rëndësishme që do të lidhë Gjirokastrën me Sarandën dhe Tepelenën. Ka qenë një moment i shumëpritur si nga bizneset e zonës, ashtu dhe nga turistët”, detajoi ministrja e Infrastrukturës dhe Energjisë, Belinda Balluku.
Ndërsa ministrja e Turizmit dhe Mjedisit Mirela Kumbaro tha se ka një ndryshim shumë pozitiv të hartës turistike, ku nga rrugë me një kah, janë shndërruar në infrastruktura lehtësuese për automjetet dhe këmbësorët.
“Praktikisht është një revolucion sa i përket hartës turistike, sepse itineraret deri tani kanë qenë me një kahje. Tani nga Saranda, edhe me trafikun që mund të ketë për shkak të turizmit, deri në fund të tunelit janë vetëm 20 minuta. Deri në rrugën e Kardhiqit janë dhe 10 kilometra pra dhe 5-6 minuta, çka e bën Sarandë – Gjirokastër, 35-40 minuta. Kjo do të thotë që harta turistike tanimë nuk është thjesht detare, por kemi një hartë turistike që lidh malin me detin dhe e bën atë që kemi objekti, turizmin gjatë gjithë vitit.
Nëse shikojmë flukset që vijnë nga porti i jahteve dhe trageteve në Sarandë, nëse deri vjet rrinin jo më shumë se një apo dy ditë, nga porti i Sarandës referohet që rrinë një javë. Unë besoj që kjo do të rritet, sepse turistët vijnë dhe kanë një ofertë shumë më të madhe që e kapin brenda harkut të gjysmë ore nga Saranda deri në Përmet. Po të kemi parasysh lidhjen që po bëhet e Ersekës dhe Përmetit me Korçën, na krijohet një hartë apo unazë turistike që lidh detin me malësitë e Korçës. Po të shtojmë dhe investimet që janë bërë që lidhin Tepelenën me Vlorën dhe Tepelenën me Himarën, praktikisht shtëpitë në Tepelenë e në Gjirokastër janë me pamje nga deti”, u shpreh ministrja Kumbaro.
