Ramadan Pllana: HALIT ZEQIRI një veprimtar i orëve të para për çlirim e bashkim kombëtar (24. 4. 1954 – 2. 10. 2021)

(24. 04. 1954 – 02. 10. 2021)

Lozanë, Zvicër, më 25 shkurt 2024: – (Në Akademinë përkujtimore të Veteranit të Lëvizjes dhe të Luftës çlirimtare, Halit Zeqiri)

E nderuara Asije Zeqiri, të nderuar familjarë të Halit Zeqirit, bashkveprimtarë, miq e dashamirë të Familjes Zeqiri, Ju përshëndes të gjithëve me ndjenjat e mia më të përzemërta !

    Haliti ishte një aktivist i lirisë kombëtare, i cili u dëshmua me veprimtarinë e vet qysh nga mosha e re, deri në vdekje, si një meteor prej luftëtari të paepur për çlirim e ribashkim kombëtar.

Të shkruash për shokët që tërë jetën e vet ia kushtuan lirisë dhe ribashkimit të atdheut – Nënës Shqipëri, jo vetëm që është një borxh kombëtar por, njëkohësisht, është edhe një përgjegjësi morale e historike, sidomos për ne bashkëveprimtarët e tyre, që t’i shkruajmë sa më me vërtetësi ngjarjet reale, në mënyrë që brezat e ardhshëm t’i kenë të gjalla në kujtesën e tyre historike e të përjetshme.

   Dëshmorët dhe veprimtarët nuk vdesin kurrë, sepse me flijimin e tyre për atdhe, me amanetin që na e lanë, duke ndjekur porositë e tyre do t’i kujtojmë si të gjallë në ndërgjegjen kombëtare e njerëzore, duke ua përcjellë brezave të ardhshëm. Emri, vepra dhe shembulli i veprimtarëve e Dëshmorëve të kombit kanë qenë, janë dhe do të jenë gjithmonë yje udhërrëfyese të përhershme për çlirim e ribashkim kombëtar. Kush i nderon dëshmorët, atdhetarët dhe luftëtarët e lirisë e nderon popullin, e nderon veten, e respekton historinë e lavdishme kombëtare, e siguron të tashmen dhe të ardhmen e atdheut.

   Me rastin e shpalosjes se pllakës përkujtimore për LPK-në në Kollare të Kërçovës, në Shtëpinë e Halit Zeqirit, më 24 prill të vitit 2017, ai do të thotë: “Prej sot e tutje shtëpia jonë ka hyrë në rrjedhat e historisë së të gjithë shqiptarëve dhe ju përgëzoj të gjithëve që ta gëzojmë lirinë dhe pllakën e vendosur në këtë vend”. Pra në këtë shtëpi u mbajt Mbledhja Konsultative e LPKR-së në prill të vitit 1993. Në këtë Mbledhje kisha nderin të isha edhe unë pjesëmarrës.

   Mbledhja konsultative e LPRK – së në Kollare (Kërçovë) ishte e një rëndësie të veçantë për Luftën e armatosur Çlirimtare, për themelimin e UÇK – së dhe çlirimin e tokave të pushtuara të Shqipërisë.

Halit Zeqiri, si në atdhe, ashtu edhe në mërgatë do të jetë i pranishëm në të gjitha veprimtaritë ilegale e legale, në mbledhje e në tubime, në protesta për të drejtat e shqiptarëve në ish -Jugosllavi.

Si anëtar i devotshëm i LPRK-së, më vonë LPK, me besnikërinë më të madhe i ka kryer të gjitha obligimet e detyrat që shtroheshin nga Kryesia e LPK-së.

   Haliti e Asija – bashkëshortja e tij, bashkë me fëmijët e tyre na kanë pritur gjithmonë bujarisht me gjithë zemër, madje edhe me sofër të shtruar me të gjitha mirat. Familja ime, shoqja me 5 fëmijë, nuk ia harron kurrë të mirën e Xha-Litit kur ai, bashkë me mua, shkuam në Aeroportin e Cyrihit, me makinën e vet për t’i merrë kur ata erdhën në Zvicër, pasi unë e kisha të drejtën e bashkimit familjar, në fillim të vitit 1998.

Halit Zeqiri, si një veprimtar i paepur i çështjes së atdheut ka ndihmuar, pa kursim, gjatë dhe pas luftës, fondet çlirimtare; Fondin e Republikës së Kosovës “Vendlindja Thërret”, fondin “Zëri i Atdheut” dhe fondin “Liria kombëtare“.

Do ta kujtojmë e nderojmë gjithmonë veprimtarinë e tij patriotike! Emri dhe vepra atdhetare e Halit Zeqirit për çlirim e bashkim kombëtar, do të jetë gjithmonë në kujtesën tonë!

LAVDI JETËS DHE VEPRËS SË HALIT ZEQIRIT!