Një incizim i shpërndarë në rrjete sociale të pulmologut të vetëm të QKMF të Besianës që humbi durimin me një pacient që kishte ardhur për t’u kontrolluar për të tretën herë rresht mbas orarit të punës mjaftoj që të ndizej një linçim publik me një orgji sharjesh e ofendimesh publike të pulmologut të “mjerë”. Këtij linçimi publik të paarsyeshëm në saje të histerisë kolektive iu bashkua edhe Prokuroria e Prishtinës (dega Podujevë) e cila me sa duket si çdo institucion tjetër në këtë vend diktohet në veprime jo nga arsyeja, profesionalizmi, urtësia dhe proporcionaliteti, por nga mediat dhe emocioni popullor.
Pulmologu plak, me 40 vite përvojë, qenka arrestuar me kallëzim penal për mosdhënieën e ndihmës mjekësore dhe rrezikon 3 vjet burg për këtë vepër penale. Jo se mosdhënia e ndihmës mjekësore që premtohej të ipej të nesërmën të ketë rezultuar me komplikime serioze për pacientin e as të ketë shkaktuar fatalitet, por ja që edhe këta duhej të përgjigjeshin fort për të qenë në nivel të “emocionit popullor” apo personal të zyrtarëve të këtij institucioni. Ja që pulmologu që refuzoj të jap një shërbim që e cilësoj si jo urgjent mbas orarit për të tretën ditë rreshtazi jo vetëm suspendohet nga Drejtoria komunale por edhe ndjeket penalisht dhe më në fund bëhet edhe vet për spital si pasojë e moshës, lodhjës, presionit psiqik dhe dhunës morale të linçimit popullor, institucional dhe gjyqësor të ushtruar ndaj tij për një sjellje të keqe të momentit dhe shtyrjës së ofrimit të një shërbimi mjekësor.Kush ka televizor është i informuar se bota dhe Kosova përballen që më se një vit me një pandemi të paprecedent ku shtëpitë e shëndetit dhe spitalet janë përplot pacient që kërkojnë kryesisht shërbime për probleme të frymëmarrjës dhe jemi në periudhën më akute të frekuentimit.
Është normale, është njerëzore që pulmologu i vetëm i një komune me 90000 banor në fund të ditës pasi ka kontrolluar mbi 100 pacient mund të humbas durimin mbase lodhja, humbja e durimit dhe gabimi janë njerëzor. Më e çuditshmja e përrallës është se familjarët e pacientëve të pyetur nga gazetarët thonë se pulmologu u ka ofruar shërbimet dhe se nuk kuptojnë përse e morrën policia duke shprehur keqardhje të thellë për gjithë këtë çmenduri që ka shkuar shumë larg. Mbetën të gjorët pa e marrë shërbimin e premtuar për të nesërmën.
E gjithë kjo situatë e pahijshme dhe ky keqkuptim erdhi me sa duket nga mbingarkesa e sistemit shëndetësor dhe pulmologut të vetëm të QKMF-së i cili i stërangazhuar për kohë të gjatë dikur plasi. Duke e privuar QKMF nga pulmologun e vetëm në kulmin e pandemisë problemi vetëm se thellohet dhe në fund të ditës niveli dhe sasia e shërbimëve të ofruara qytetarit vetëm sa vjen e ulët e pakohet. Përtej tragjedisë individuale të pulmologut që mjaftonte ti tërhiqej vërejtja pësojn të gjithë qytetarët e Besianës që mbetën pa pulmologun e vetëm në një kohë kur me siguri mungojnë aty edhe shumë teknik, laborant dhe mjekë tjerë mbase edhe ata prekën prej Covidit dhe sëmundjëve tjera. Aktualisht situata është dramatike në shtëpitë e shëndetit ku ka një fluks të paparë pacientësh Covid dhe një epidemi edhe te personeli mjekësor gjë që bën shtëpitë e shëndetit të funksionojnë me staf të reduktuar dhe personelin të kryej vërtetë një punë mbinjerëzore në kushte jo njerëzore.Çdo i dyti budalla që takoni në rrugë është i aftë të ankohet, të kritikoj dhe të denoj, por duhet fisnikëri dhe aftësi për të parë gjërat nga lëkura dhe këndvështrimi i tjetrit për të kuptuar e vlerësuar mirëfillti mundin dhe zorrin e tjetrit.
Mjerisht, shoqëria jonë vitëve të fundit u ka dhënë vlerë dhe ka fuqizuar budallenjtë, vullgarët dhe në përgjithësi çdo instinkt primitiv dhe element negativiteti. Rrjetet shoqërore, dinamika e tyre dhe paaftësia e njerëzve dhe institucionëve tanë për të menaxhuar me gjakftohtësi këto situata dhe bërë ballë me arsyen e interesit të përgjithshëm dhe të shtetit popullizmit dhe vullgaritetit sjellin në të tilla situata ku ka vetëm humbës dhe askush nuk fiton gjersa personeli mjekësor që është vërtetë heroik dhe në nivel detyre në këto kushte linçohet, zhvlerësohet dhe demoralizohet në këto momente ku lodhja i sjellë buzë greminës dhe gabimit.Urojmë që dikush ti jap fund budallakisë dhe idiokracisë briliante të treguar nga të gjitha palët e përfshira në këtë rast dhe pulmologu ti kthehet punës shëndosh e mirë dhe me gjakftohtësi të rifituar mbase për të ka nevojë tani Besiana.
Urojmë që nga ky rast të merrët mësim që mos të lejojmë idiokracinë, emocionët popullore, populizmin të diktojnë veprime të pamatura, disproporcionale dhe të cilët shkaktojnë një dëm të pakrahasueshëm më të madhë shoqërisë se keqsjelljën që pretendojnë të korrigjojnë.Mbase idiokracia edhe mund të vret kur tërheqë specialistin e vetëm të pulmologjisë një qyteti të tërë, një shërbimi shëndetësor veçse të mbigarkuar që mbahet në funksion vetëm fal mundit mbinjerëzor të burrave dhe grave që japin kontribut përtej mundësive dhe privon ashtu qytetarët nga shërbimet e specialistit në kohën e fortunës së pandemisë.
