Bijtë e kotësisë
po t’i shikosh
nga pamja e jashtme
të duken
sikur secili me vete bartë
në gji
nga një copë histori
dilemë për pak çaste
vrasje e butë me çaj e duhan
dënim absurd
pajtim i heshtur me shëmtitë
ata në rrethin e trishtimit meditojnë
nga jeta
as gjë nuk kërkojnë
bijtë e kotësisë
që nuk e përballuan dot
peshën e madhe të historisë
Në mes
në mes të strajcës së kurbetçiut
dhe buxhetit të Qeverisë
një vrimë llogari- rrjedhëse
mohuar sakrificë për bukën e djegur
kur nevojën më nuk ta kanë
ta shajnë bukën e djersën tënde
të mohojnë
të bëjnë haram
kurbetçiu me strajcën e shpresave
mbi krahët e kërrusur
e kokën varë
ikën prapë
pa strajcë erdhi dje
kush një fjalë të mirë s’ia tha
pa strajcë
dyert ishin mbyll
mirëseardhja u dhje
dallimi mes ndërgjegjes dhe strajcës
lumë i madh
ndërgjegje e futur në strajcë
ndërgjegje gërmadhë
në udhëkryqet e kurbetçinjve
zhgënjimi
sa një mal
