Muzeu virtual “Fototeka” ka hapur ‘dyert’ për të pasionuarit pas fotografisë.
Në këtë muze virtual publikohet trashëgimia fotografike në trojet shqiptare nga fundi i shekullit XIX deri nga fundi i shek. XX.
Në këtë muze pasqyrohen mbi 7000 imazhe të ndara në 7 periudha historike, që janë shkrepur nga dhjetëra fotografë, kryesisht të juglindjes së Shqipërisë, ku shpaloset më shumë se një shekull histori.
Ministrja e Kulturës, Elva Margariti tha se “me mbështetjen e Ministrisë së Kulturës, me kontributin e koleksionistëve privatë, Fondacioni “Art & Histori” hapet një dritare ku mund të zbuloni imazhe që nuk i keni ndeshur më parë”.
Në këtë muze shfaqen rreth rreth 40 albume nga fundshekulli XIX – mesi i shekullit XX, si pllaka xhami, diapozitivë, negativë në letër, filma dhe foto origjinale.
Këto albume përmbajnë imazhe nga Lufta e Parë Botërore, pamje nga ndërtimet e trupave italiane në ishullin e Sazanit (1918 -1922), në qytetin e Vlorës (1916 – 1920), ndërtimi i portit të Durrësit (1929-1932), pelegrinazhi në ‘Kuotën 731’, Rehovë, Skrapar në kujtim të Luftës Italo-Greke (1941) etj.
Të pranishme janë edhe albumet e shtetit socialist të Enver Hoxhës, që ilustrojnë ndërtimin e hekurudhës së parë Durrës-Peqin (1947), ndërtimin e Kombinatit të Tekstileve ‘Stalin’ (1951), ndërtimin e hidrocentralit ‘Lenin’ (1951) e duke vazhduar më tej me albumet dhuratë për udhëheqësin Enver Hoxha.
Rreth 2000 negativët në pllaka xhami, qindra negativë të tjerë në letër apo film, pjesë e këtyre koleksioneve, u digjitalizuan dhe u kthyen në imazhe pozitive për të lehtësuar çasjen në përmbajtjen e tyre. Materiali i digjitalizuar përmban fotografi nga fundshekulli XIX gjer në mesin e shekullit XX dhe çdo imazh është plotësuar me përshkrime, vite dhe teknika në formën e skedave digjitale.
Këto koleksione të rralla hedhin dritë mbi mënyrën e jetesës së njerëzve të ndryshëm që jetuan dhe punuan në këto territore rreth një shekull më parë, zakonet, besimet dhe traditat e tyre.
