Albin Kurti, sa ishte në opozitë, me të drejtë thoshte se “zajednicën mund ta pranojë vetëm një serbofil”. Albini i opozitës kishte të drejtë, sepse duhet të jesh pjellë bastarde e kombit tëndë që ta miratosh një entitet serb (zajednicën) në zemër të Kosovës shqiptare… Krijimi i një entiteti serb (bashkësi e komunave “serbe”) dhe i një kishe ortodokse “serbe” me status “special” do të përbënin kërcënim permanent për stabilitetin, sigurinë dhe paqen në Kosovë dhe në rajon. Prandaj, propozimi franko – gjerman, që nuk përfshin njohjen e shtetit të Kosovës edhe de jure nga Serbia, por që në anën tjetër i kërkon Kosovës që ta njeh dhe themelon entitetin serb, nuk duhet të pranohet nga Republika e Kosovës – Krzeministri i saj… (GL)
TIRANË, 28 shkurt/ATSH/- Zëdhënësi i Bashkimit Evropian, Peter Stano, ka konfirmuar se liderët e Kosovës dhe Serbisë e kanë miratuar të hënën propozimin e BE-së për normalizim të marrëdhënieve.
“Ajo që u ra dakord në takim është se nuk ka nevojë për diskutime të mëtejshme për përmbajtjen, për tekstin e propozimit dhe se do të punojmë me palët për zbatimin. Natyrisht, ne si BE do t’i ndihmojmë ata. Ne do të vazhdojmë përpjekjet tona lehtësuese. Ata e miratuan propozimin. Ata ranë dakord që nuk nevojiten diskutime të mëtejshme rreth dokumentit dhe se mund të kalojmë në fazën tjetër”, ka thënë Stano në një konferencë të rregullt për media.
Të hënën, më 27 Shkurt, Kryeministri i Kosovës, Albin Kurti dhe presidenti serb, Aleksandar Vuçiç, janë takuar në Bruksel për të diskutuar propozimin e BE-së.
Në fund të takimit, pro-planit është shprehur vetëm Kryeministri i Kosovës, Albin Kurti, ndërsa Vuçiç – duke iu shmangur deklaratave për planin – ka thënë se është e mundur të arrihen disa kompromise dhe janë duke punuar për zbatimin e marrëveshjeve ekzistuese.
Nikoqiri i takimit të liderëve, kryediplomati evropian, Josep Borell, kanë thënë në fund të ditës se të dyja palët kanë shprehur gatishmëri për të vazhduar në zbatimin e marrëveshjes.
Zëdhënësi i Brukselit, Peter Stano, ka përsëritur se diskutimet e mëtejshme për dokumentin evropian nuk janë më të nevojshme, dhe se tani po punohet për modalitetet e zbatimit të marrëveshjes.
Propozimi evropian u është dorëzuar palëve fillimisht në vjeshtën e vitit 2022. Ky propozim parashihet t’i drejtojë palët drejt një marrëveshjeje gjithëpërfshirëse.
Propozim-marrëveshja që është bërë publike pas takimit, përfshin zotimin e palëve për t’i respektuar të gjitha marrëveshjet e arritura deri më tani në dialogun për normalizimin e marrëdhënieve, si dhe përkushtimin e tyre për të mos e penguar njëra-tjetrën në proceset integruese.
Marrëveshjet e deritashme përfshijnë edhe atë për themelimin e Asociacionit të komunave me shumicë serbe në Kosovë, e cila është arritur në vitin 2013, por nuk është zbatuar kurrë.
Kurti thotë se në Kosovë nuk mund të ketë asociacion njëetnik me kompetenca ekzekutive, ndërsa Vuçiç insiston në themelimin e tij.
